Kab hoga watan laut kay jana mere bhaiyya

                          Nauha
Kahti thi yeh Sajjad (as) se ro ro kay Sakina (sa) 
Kab hoga watan laut kay jana mere bhaiyya 
dushwar hai ab sham kay zindan main jeena 
Kab hoga watan laut kay jana mere bhaiyya 

bhaiyya mujhe is qaid main need aati nahi hai 

Cut jata hai din raat guzar pati nahi hai 

Bistar hai na takya na yahan baba ka seena 

Kab hoga watan laut kay jana mere bhaiyya 

Main roti hun jab yaad main baba ki tadap kar 

dete hain mujhe ghudkiyan aa aa kay sitamgar 

is qaid e sitam main to hai rone peh bhi pahra 

Kab hoga watan laut kay jana mere bhaiyya 

Ammu bhi mujhe aa ke dilasa nahi dete 

Baba bhi to ab goad main aa kar nahi lete 

kya meri khata hai ki har ik mujhe se hai rootha

Kab hoga watan laut kay jana mere bhaiyya 

Kamsin hun yateema hun main aur gham ki satai 

Koi bhi meri sunta nahi aa kay duhai

Tadpata hai har pal mujhe is baat ka sadma 

Kab hoga watan laut kay jana mere bhaiyya 

Is darja masayeb se pareshan hun bhai 
Lagta hai ki kuch rose ki mehman hun bhai
Ab maut ka aata hai mere rukh peh paseena 

Kab hoga watan laut kay jana mere bhaiyya 

Woh pyas ka aalam hai ki dil baith raha hai 

Kuch aisa mera gham hai ki dil baith raha hai 

Saso'n se juda hone ko hai ab mera rishta 

Kab hoga watan laut kay jana mere bhaiyya 

Yaad aata hai har waqt mujhe shahr e madina 

Bechain mere hijr main hogi meri bahna 

Dushman hai sabhi koi yahan par nahi apna 

Kab hoga watan laut kay jana mere bhaiyya 

Bhaiyya yeh parinde to chale jate hain ghar ko
Kab jayengay hum laut kay itna to bata do 
Kuch dair ko mil jaye mere dil ko dilasa 
Kab hoga watan laut kay jana mere bhaiyya 

Yeh kahte huway khak peh munh rakh kay woh bachchi

Soi to magar need se roti hui jagi 

Aur bhai se boli ki abhi aaye thay baba

Kab hoga watan laut kay jana mere bhaiyya 

Sad haif watan ja na saki bali Sakina (sa)  

Aye chand suway khuld sidhari woh yateema

Rahta tha sada jis kay labon par yahi jumla 

Kab hoga watan laut kay jana mere bhaiyya 

............Zeya Abbas (Haideri)............

YouTube Search on Zeya Jalalpuri 

                   India