Madina ja kay bahen ko salam kah dena

          (Nauha) 

Sakina (sa) kahti thi apni phuphi se ro ro kar

Madina ja kay bahen ko salam kah dena

Meri mareeza bahen ko salam kah dena

Na ja sakungi palat kay dobara ab main ghar

Madina ja kay bahen ko salam kah dena

Hai karti tum se waseeyat faqat yahi muztar

Madina ja kay bahen ko salam kah dena

Mujhe yaqee’n hai mulaqaat ab nahi hogi

Meri bahen se koi baat ab nahi hogi

Zarur yaad mareeza woh kar rahi hogi

Meri judai se haye tadap rahi hogi

Hai kaisa haal bahen ka nahi hai us ko khabar

Madina ja kay bahen ko salam kah dena

Phuphi palat kay madina kabhi jo jao gi

Meri mareeza bahen ko gale lagao gi

Agar jo puche gi mujh ko to kya batao gi

Bahen ko dekh kay aans’u faqat bahao gi

Meri mareeza bahen ko salam kah dena

Madina ja kay bahen ko salam kah dena

Jo puche mujh ko Sakina (sa) nazar nahi aati

To kahna sham kay zinda’n main hai bahen soti

Na kahna mere gale main rasan bandhi thi phuphi

Nahi to sun kay woh mar jayegi bahen meri

To hogi taza museebat yeh aale Ahmed par

Madina ja kay bahen ko salam kah dena

Jo puche mar gai kaise phuphi Sakina (sa) meri

To kahna jheli hain bachchi ne sakhtiya’n itni

Jo marte thay tamanche teri bahen ko shaqi

Chacha ko bhai ko baba ko yaad karti thi

Batana ranj o masayeb se mar gai khahar

Madina ja kay bahen ko salam kah dena

Jo puche zulm o sitam kya hua Sakina (sa) par 

To kahna apne kaleje ko tham le muztar

Batana baad main bandhi gai thi naqe par

Gala bhi uska bandha tha rasan main you’n kas kar

Thi sans leti badi mushkilo’n se ghut ghut kar

Madina ja kay bahen ko salam kah dena

Agar jo puche kaha’n thay mere chacha Abbas (as)

To kahna pani jo lane gaye chacha Abbas (as)

Lab e furat peh he rah gaye chacha Abbas (as)

Yeh zulm dekh na pate tere chacha Abbas (as)

Bala kay dasht main barbad ho gaya sub ghar

Madina ja kay bahen ko salam kah dena

Jo puche kyon nahi aaya mera jawa’n bhaiyya

To kahna sun kay kaleje ko tham le dukhiya

Laga kaleje peh Akbar (as) kay is tarah naiza

Ulajh kay rah gaya us main jigar brother ka

Ragad kay aidiya’n woh mar gaya meri muztar

Madina ja kay bahen ko salam kah dena

Zarur puche gi baba ko aur Asghar (as) ko

Badi he aas se dekhe gi haye mather ko

Lagaye rakhna kaleje se meri khahar ko

Woh kis tarah se bhula de’n lutay huway ghar ko

Tasalli dena mareeza ko aye phuphi ja kar

Madina ja kay bahen ko salam kah dena

Sakina (sa) kahti thi ZAHID yeh haal mal mal kay

Madina jayega wapas jo qafela chut kay

To surah e fateha padh dena meri turbat peh

Andhere zinda’n main tanha rahungi main kaise

Tadap kay kahti rahi bus yeh dukhtar e sarwar

Madina ja kay bahen ko salam kah dena

Poet: Janab ZAHID Mustafabadi Jalalpur Ambedkar Nagar

Nauha By Anjuman Jafaria Redg. Mustafabad Jalalpur Ambedkar Nagar

…………Zeya Abbas Haideri…………

YouTube Search On Zeya Jalalpuri

              India