8 Rabeeul Awwal Alwidai Nauha ll Nabi ki aal madine main lut kay aayi hai

                       (Nauha)

Nabi ki aal madine main lut kay aayi hai

Hussain (as) pyase ka Zainab (sa) salam layi hai

Khabar basheer ne aa kar yeh kya sunayi hai

Ki qabr Ahmad e mursal ki thar tharayi hai

Udasi har dar o deewar par bhi chayi hai

Gham o alam se har ik chashm dub dabayi hai

Nabi ki aal madine main lut kay aayi hai

Hussain (as) pyase ka Zainab (sa) salam layi hai

Gayi mazar e payamber peh nauha kha’n Zainab (sa)

Giri lahed peh basad nala o fugha’n Zainab (sa)

Lipat kay qabr se karne lagi baya’n Zainab (sa)

Luta kay aayi hai jangal main karwa’n Zainab (sa)

Utho mazar se nana mere duhayi hai

Hussain (as) pyase ka Zainab (sa) salam layi hai

Kabhi na bhule gi Zainab (sa) woh zulm ka manzar

Akela tha mera bhai hazaro’n baniye shar

Har aik samt se barsa rahe thay teero tabar

Sawar doshe payamber tha apne khoon main tar

Bayan kya kare Zainab (sa) jo kho kay aayi hai

Hussain (as) pyase ka Zainab (sa) salam layi hai

Lipat kay qabr se Zainab (sa) pukari aye nana

Pase Hussain (as) hame’n zalimo’n ne you’n loota

Jalaya aag se khaima saro’n se cheeni rida

Rasan main hum ko laeeno’n ne is tarah bandha

Yeh dekho aaj bhi zakhmi meri kalayi hai

Hussain (as) pyase ka Zainab (sa) salam layi hai

Uthi lahed se phir ik bar Zainab (sa) e Mahzoo’n

Zameen hilne lagi kanpne laga gardu’n

Tabarrukaat kushada kiye bahal e zaboo’n

Nikal kar kaha shah ka amama e pur khoo’n

Safar se nana yeh tohfa nawasi layi hai

Hussain (as) pyase ka Zainab (sa) salam layi hai

Tha qabr e paak e nabi par yeh haal bano ka

Liye thi hath main Besheer (as) ka jala jhula

Rakha mazar peh Asghar (as) ka khoo’n bhara kurta

Kaha ki aap ki ummat ka layi hu’n shikwa

Ki sheer khar bhi mara gaya duhayi hai

Hussain (as) pyase ka Zainab (sa) salam layi hai

Phuphi se Fatima Sughra (sa) ne pucha yeh ro kar

Batao aye phuphi amma’n kaha’n hain mere pidar

Dekha do hai kaha’n bhaiyya mera Ali Asghar (as)

Kaha phuphi ne ki aye beti lut gaya sub ghar

Tamam kunbe ko jangal main kho kay aayi hai

Hussain (as) pyase ka Zainab (sa) salam layi hai

Kaha yeh aan kay Ummul Banee’n ne Zainab (sa) se

Mujhe yaqee’n nahi kyon kar Hussain (as) qatl huway

Kaha’n peh tha mera Abbas (as) yeh bata do mujhe

Jigar ko tham kay farmaya ro kay Zainab (sa) ne

Tumhare sher ko dariya peh maut aayi hai

Hussain (as) pyase ka Zainab (sa) salam layi hai

Baya’n yeh Zainab (sa) e nashad ne kiya jis dam

Hussain (as) mar gaye jeeti rahi main haye sitam

Bandhe thay hath na bhai ka kar saki matam

ATA yeh sun kay hili qabr e mursale aazam

Watan main aayi main jangal main mera bhai hai

Hussain (as) pyase ka Zainab (sa) salam layi hai

Poet: Late ATA Sahab Mustafabad Jalalpur A.N

…………Zeya Abbas Haideri…………

YouTube Search On Zeya Jalalpuri

                       India