Nauha Hazrat Ali Akbar (as) ll Hussain (as) kahte thay ro ro kay meri maa’n Zahra (sa) Duaye’n mango jawa’n lal tak pahunch jau’n

                         (Nauha)

Hussain (as) kahte thay ro ro kay meri maa’n Zahra (sa)

Duaye’n mango jawa’n lal tak pahunch jau’n

Mera shabeeh e payamber mujhe nahi milta

Duaye’n mango jawa’n lal tak pahunch jau’n

Hai kaun mujh ko jo pahunchaye mere betay tak

Lagengi thokare’n kitni waha’n pahunchne tak

Khuda he jane ki tay kaise rasta hoga

Duaye’n mango jawa’n lal tak pahunch jau’n

Bahut sambhal kay ik ik qadam uthata hun

Magar main thokare’n maqtal main phir bhi khata hun

Hai kaun thame jo bazu yeh aan kar mera

Duaye’n mango jawa’n lal tak pahunch jau’n

Bade he nazo’n se bachpan main jis ko pala hai

Usi peh waqt e zaeefi main aisa aaya hai

Jawan lal ki mayyat talash hai karta

Duaye’n mango jawa’n lal tak pahunch jau’n

Meri zaban main hain pyas se pade chale

Hu’n itna pyasa kaleje main aise waqt pade

Nazar main pyas ki shiddat se hai dhuwa’n chaya

Duaye’n mango jawa’n lal tak pahunch jau’n

Nigah apni main jis samt bhi uthata hun

Lahu main doobi shaheedo’n ki lash pata hun

Magar mujhe mera Akbar (as) nazar nahi aata

Duaye’n mango jawa’n lal tak pahunch jau’n

Hai jab se mara gaya nahr par mera Abbas (as)

Hai mujh ko bhai kay marne ka is qadar ahsas

Yeh thoda fasla bhi mujh se tay nahi hota

Duaye’n mango jawa’n lal tak pahunch jau’n

Hameri jane’n fida ho’n Hussain (as) par aye ZAFAR

Tadapne lagta hai seene main sonch kar yeh jigar

Mera Imam (as) badi bekasi se kahta tha

Duaye’n mango jawa’n lal tak pahunch jau’n

Poet: Maulana Zafrul Hasan Zafar Sahab Mustafabad Nagpur Jalalpur Ambedkar Nagar UP India

Nauha By Anjuman Jafaria Redg.Mustafabad Nagpur Jalalpur Ambedkar Nagar UP India

…………Zeya Abbas Haideri…………

YouTube Search On Zeya Jalalpuri

                      India