Nauha Imam Sajjad (as) ll Yaad kar kay umr bhar rote rahe Zainul Eba (as)

                         (Nauha)

Sar zameen e karbala par khoon main dooba chaman

Yaad kar kay umr bhar rote rahe Zainul Eba (as)

Kho kay 18 bani hashim ko jab laute watan

Yaad kar kay umr bhar rote rahe Zainul Eba (as)

Puchiye maula kay dil se khoon main tar mayyate’n

Ik nazar main kis tarah dekhi 72 mayyate’n

Jism par un mayyato’n kay khak e sahra ka kafan

Yaad kar kay umr bhar rote rahe Zainul Eba (as)

Sath sub kay lasha e Asghar (as) tha run main you’n pada

Dhoop main ho jaise koi phool murjhaya hua

Har ghadi rahta nazar main lasha e ghuncha dahen

Yaad kar kay umr bhar rote rahe Zainul Eba (as)

Jab kisi kadyal jawa’n ko dekh lete thay Imam (as)

Haye Akbar (as) kah kay aur ghash kha kay gir padte imam (as)

Bhoolte kaise woh 18 baras ka gul badan

Yaad kar kay umr bhar rote rahe Zainul Eba (as)

Jab kafan pahne huway koi janaza dekhte

Turbat e Shabbeer (as) peh rote kaleja tham kay

Khak ki chadar main lipta baap ka tukde badan

Yaad kar kay umr bhar rote rahe Zainul Eba (as)

Bibiyo’n kay hath jis main thay pase gardan bandhe

Tha gala Sajjad (as) ka un main he bachcho’n kay gala

Is tarah se 12 qaidi 1 choti si rasan

Yaad kar kay umr bhar rote rahe Zainul Eba (as)

Khoon kay aansu rulata tha yateema ka khayal

Har ghadi rahta khayalo’n main Sakina (sa) ka sawal

Sham ko yeh puchna jayengay hum kis din watan

Yaad kar kay umr bhar rote rahe Zainul Eba (as)

1 lamha bhi nahi bhoole Sakina (sa) ko kabhi

Qaid main nanhe gale se jab rasan kholi gayi

Tha Sakina (sa) kay gale par dekha jo daagh e rasan

Yaad kar kay umr bhar rote rahe Zainul Eba (as)

Choti choti bachchiyo’n par jab kabhi padti nazar

Kah kay tab haye Sakina (sa) tham lete thay jigar

Mar gayi zindan main ghut ghut kay jo pyasi bahen

Yaad kar kay umr bhar rote rahe Zainul Eba (as)

Haye nana kay madine se main kitna door tha

Sham kay zindan mein main kis qadar majboor tha

De nahi paya Sakina (sa) ko bhi chota sa kafan

Yaad kar kay umr bhar rote rahe Zainul Eba (as)

Pao’n main thi bediya’n lene kafan jaye kaha’n

Pani jee bhar kay nahi milta kafan paye kaha’n

Thi bahen badle kafan pahne jala ik pairahan

Yaad kar kay umr bhar rote rahe Zainul Eba (as)

Kho kay jangal main bhara ghar haye ab kaise jiyo’n

Ho gaye sub qatl pyase pani main kaise piyo’n

Zibh kay bhi waqt baba thay mere tashna dahen

Yaad kar kay umr bhar rote rahe Zainul Eba (as)

Bus yahi to sonch kar rote thay maula aye ZAFAR

Zalimo’n ki qaid se azaad main hota agar

Bekafan baba ki khatir mang kar lata kafan

Yaad kar kay umr bhar rote rahe Zainul Eba (as)

Poet: Maulana Zafrul Hasan Zafar Sahab Mustafabad Nagpur Jalalpur Ambedkar Nagar UP India

Nauha By Anjuman Jafaria Redg.Mustafabad Nagpur Jalalpur Ambedkar Nagar UP India

…………Zeya Abbas Haideri…………

YouTube Search On Zeya Jalalpuri

                  India