Pyasi hai Sakina (sa)

                     (Nauha)

Aye baad e saba ja kay yeh ammu ko batana

Pyasi hai Sakina (sa)

Yaad aaye Sakina (sa) to chahcha laut kay aana

Pyasi hai Sakina (sa)

Is chote se sin main woh sitam main ne uthaye

Allah kisi ko na yateem aisa banaye

Khud apne lahu main koi bachchi na nahaye

Main tum ko bulati rahi tum bhi to na aaye

Main ban gayi baad asr laeeno ka nishana

Pyasi hai Sakina (sa)

Ghar laut kay jate hain har ik sham parinde

Qismat main likhe hain meri zinda’n kay andhere

Kab tak main jiyou’n gi you’n he ashko’n kay sahare

Lagta hai ki mar jaungi ab door watan se

Hoga na mayassar mujhe ghar laut kay jana

Pyasi hai Sakina (sa)

Jis roze se Asghar (as) ko mila baba ka seena

Us roze se ammu nahi so payi Sakina (sa)

Is haal main jaungi main kis tarah madina

Aajaye mujhe maut hai kis kaam ka jeena

Jagi hu’n bahut aa ke chacha mujh ko sulana

Pyasi hai Sakina (sa)

Pani ki talab mujh ko khilati rahi thokar

Kahta tha laee’n dunga main faujo’n pila kar

Jab shimr e laee’n kar chuka sairab yeh lashkar

Dikhla kay mujhe phaink diya pani zamee’n par

Tab samjhi main kya hota hai ummeed dilana

Pyasi hai Sakina (sa)

Ik jaam hua sham e ghareeba’n main moyassar

Woh kooza main rakh aayi thi Asghar (as) ki lahed par

Tha mujh se bhi chota mera bhaiyya mera dilbar

Sharminda main ho jati chacha pyas bujha kar

Ab apne he hatho’n se meri pyas bujhana

Pyasi hai Sakina (sa)

Ik rassi main hum sub kay gale bandh kay aada

Karte huway tashheer chale janib e koofa

Aur us peh museebat yeh thi qad mera tha chota

Jab uthti thi’n phuphiya’n to gala khinchta tha mera

Garden ka meri zakhm chacha dekhne aana

Pyasi hai Sakina (sa)

Thi dil ki tamanna wahi’n maut aaye mujhe bhi

Turbat hai tarayi peh jaha’n mere chacha ki

Ik choti si sahil peh bane qabr bhi meri

Yeh aakhri khowahish bhi na ho paye gi poori

Mar kar bhi rahega mera zinda’n main thikana

Pyasi hai Sakina (sa)

ANWAR yeh sada parcham e Abbas (as) se aayi

Main bhool nahi sakta Sakina (sa) meri bachchi

Kate gaye bazu mere majboor tha bibi

Mashkeeza alam main hai bandha dekh le ab bhi

Parcham ka mere kaam hai duniya ko batana

Pyasi hai Sakina (sa)

Poet: Janab ANWAR Allahabad UP India

…………Zeya Abbas Haideri…………

YouTube Search On Zeya Jalalpuri

                      India