Yeh Zainab (sa) kay gham ka ajab waqeya hai ll Anjuman Jafaria Redg.Mustafabad Nagpur Jalalpur Ambedkar Nagar UP India

                    (Nauha)

Yeh Zainab (sa) kay gham ka ajab waqeya hai

Rasan basta darbar main qafela hai

Aseero’n peh kaisa yeh din aa pada hai

Ki beemar qaisi banaya hua hai

Jo darbar e hakim main aaye hain qaidi

Rasan basta har aik bibi khadi thi

Kisi ka gala aur kalayi bandhi thi

Laee’n samne unke baitha hua hai

Jo zalim ne nanhi Sakina (sa) ko dekha

To shimr e sitamgar se usne yeh pucha

Yeh kis ki nishani hai mujh ko bhi batla

Kaha is ko shah ne Sakina (sa) kaha’n hai

To bola Sakina (sa) se kahim sitamgar

Rakha hai kyo’n hatho’n ko munh aur gale par

To hakim se boli Sakina (sa) yeh ro kar

Gala mera rassi main jakda hua hai

Hain ik he rasan main bandhe 12 qaidi

Ki in qaidiyo’n main Sakina (sa) hai choti

Gale ki rasan is wajah se hai khinchti

Rasan khinchte khinchte gala kas utha hai

Azeezo ab aage ki you’n hai rawayat

Ki sun kar jise tari ho jaye riqqat

Nabi zadiya’n aur aseeri ki halat

Zamane main kya inqelab aa gaya hai

Yazeed e laee’n bola shimr e laee’n se

Mujhe baat karna hai Zainab (sa) hazee’n se

Har ik bibi hat jaye un kay qaree’n se

Yeh shimr e sitamgar ne jis dam suna hai

Liye taziyana qaree’n aa kay bola

Har ik bibi hat jaye hakim hai kahta

Yeh sun kay hati’n sub magar haye Fizza

Ki us dam bhi Zainab (sa) ka parda kiya hai

Jo dekha ki Fizza nahi hat rahi hain

Woh Zainab (sa) kay parde ki khatir khadi hain

To bola ki ab shahzadi nahi hain

Ab aaj unka kunba to qaidi bana hai

Yeh kah kah kay jab tazeeyana uthaya

To habshi ghulamo’n se boli yeh Fizza

Meri qaum walo nahi dekhte kya

Tumhari hameeyat ko kya ho gaya hai

Yeh sun kay har ik ne talwar khainchi

Kaha ki yeh hakim ki bedad kaisi

Mana kar de warna nadi khoon he ki

Baha dengay yeh qaum ka mamla hai

Jo Zainab (sa) ne Fizza ka dekha yeh rutba

Akhi kay kate sar ko hasrat se dekha

Kaha ro kay kaise karu’n sabr bhaiyya

Moqaddar he Zainab (sa) ka phoota hua hai

Bulaya jo Fizza ne nusrat ki khatir

Jawa’n 400 ho gaye aake hazir

Magar haye Zainab (sa) ka koi na nasir

Bulau’n kise kaun ab rah gaya hai

Suna jab ki shah ne bahen ka yeh nauha

To shah ka kata sar lagan he main roya

To sar ne nida di bahen sabr karna 

Yahi tere bhai ki bus ilteja hai

Azadro Zainab (sa) ne shah ko nida di

Agar hote zinda jo Abbas e (as) Ghazi

To Zainab (sa) itni museebat na aati

Magar sher pahle mera mar chuka hai

Yeh sunte he kanp uththa Abbas (as) ka sar

Nida di ajal se hun majboor khahar

Nahi to bhala sabr karta main kyo’n kar

Ki darbar main bhi tera sar khula hai

ZAFAR haye aalam ki shahzadiyo’n par

Yeh din aa gaya hai nabi zadiyo’n par

Hain bazar aur darbar main bhi khule sar

Ki bazu bhi uska rasan main bandha hai

Poet: Maulana Zafrul Hasan (ZAFAR Sahab) Mustafabad Jalalpur A.N (Moqeem Gujrat)

Nauha by Anjuman Jafaria Redg.Mustafabad Nagpur Jalalpur Ambedkar Nagar UP India

…………Zeya Abbas Haideri…………

YouTube Search On Zeya Jalalpuri

                       India